Татарстан табигатьтә ял тәкъдим итә: регионда матур урыннарда 60 тан артык глэмпинг бар. Туристлар өчен иң яхшы комплекслы уңайлы гид әзерләнгән, ә туроператорлар, эко-ялны җәйге сезонның вакыйгаларга бай афишасы белән яраштырырга тәкъдим итеп, стандарт булмаган турпродуктлар булдыра ала.

Яшь профессионаллар Татарстанның туризм тармагын үстерүдә этәргеч көчкә әверелә. Бүген 2500дән артык студент республиканың 18 уку йортында туристлык һәм кунакчыллык өлкәсендә белгечлекләрне үзләштерә, ә волонтерлык хәрәкәте меңләгән актив катнашучыларны берләштерә. Инде хәзер үк бу яшьләр белем алып кына калмыйлар, ә регионның туристлык потенциалын үстерүгә реаль өлеш кертәләр, Бөтенроссия дәрәҗәсендә шаккатыргыч нәтиҗәләргә ирешәләр.

Кунакханә, шифаханә, ял базасы һәм башка урнаштыру чаралары хуҗалары 2025 елның 1 сентябренә кадәр мәҗбүри үзбәя процедурасын узарга һәм үз объектының классификациясен федераль реестрда расларга тиеш. Таләп РФ законнары белән билгеләнгән, ә аны үтәмәү предприятие эшчәнлеген законсыз дип тануга китерергә мөмкин. 

Татарстанда актив ял итү мөмкинлекләрен киңәйтәләр. «Туристлык һәм кунакчыллык индустриясе» илкүләм проекты ярдәмендә Әлмәт, Бөгелмә һәм Зәй районнарында, чаңгы һәм сноубордлардан алып пейнтбол һәм атта йөрү өчен кирәк-яракларга кадәр, прокат үзәкләре һәм ял базалары инвентарьларын яңарттылар.

Ясалма интеллект кулланып эшләнгән яңа «Эшкуар ярдәмчесе» чат-боты туристлык бизнесына контроль органнары белән дөрес хезмәттәшлек итәргә ярдәм итәчәк. Сервис тикшерүләргә алдан әзерләнергә, киң таралган хокук бозуларны булдырмаска һәм штраф санкцияләре куркынычын киметергә мөмкинлек бирә.

Татарстан Республикасы Туристлык буенча дәүләт комитеты вәкилләре модульле капиталь булмаган урнаштыру чараларын булдыруга дәүләт ярдәме күрсәтү конкурсында җиңүче эшкуарлар белән очрашу уздырды. Фикер алышулар вакытында субсидия бирү сроклары һәм шартлары, шулай ук янгынга каршы нормалар һәм объектларны сәламәтлеге буенча мөмкинлекләре чикләнгән кешеләр өчен җайлаштыру мәсьәләләре кузгатылды.

Мәскәүдә юбилейлы «Сәяхәт ит!» бишенче халыкара туристлык форумы узды. Ул беренче тапкыр халыкара статусын алды. Чарада Россиядән һәм 9 чит илдән 438 оешма вәкилләре катнашты, ә Россия Федерациясе Хөкүмәте Рәисе урынбасары Дмитрий Чернышенко катнашындагы пленар утырыш  һәм Татарстанның масштаблы экспозициясе төп вакыйгаларга әверелде, анда кунаклар милли ашлар белән таныштылар, татар телен өйрәнделәр һәм сувенирлар ясадылар.

Июнь бәйрәмнәрендә Visit Tatarstan бренды чатырларында 2000нән артык турист мәгълүмати ярдәм алды. Туристлык волонтерлары кунакларга Казанның ике мәйданчыгында — Камал театры янында һәм Бауман урамында карталар һәм истәлекле урыннар турында мәгълүмат биреп ярдәм итәләр.

Татарстан Республикасының 29 проекты 2025-2027 елларда урнаштыру өчен модульле капиталь булмаган чаралар булдыруга Россия Икътисадый үсеш министрлыгының конкурс сайлап алуында җиңүче булды. Субсидияләрнең гомуми күләме 739,5 млн.сум тәшкил итәчәк, шуның 536,4 млн.сумы – федераль бюджеттан һәм 203,1 млн.сумы – республика бюджетыннан. Казанда һәм республиканың 11 районында «Туристлык һәм кунакчыллык» илкүләм проекты кысаларында яңа объектлар барлыкка киләчәк.

«Сколково» үзәгендә «Здравница-2025» төп тармак форумы узды, анда Татарстан шифаханәләре үзләренең сәламәтләндерү программаларын тәкъдим иттеләр. Республика шифаханәләре, төбәкнең шифаханә-курорт өлкәсендә лидерлык позициясен раслап, 17 алтын һәм 5 көмеш медаль алдылар. ТР Туристлык буенча дәүләт комитеты ярдәмендә «Татарстан шифаханәләре» ассоциациясенең берләштерелгән стенды кунакларның игътибарын  җәлеп итте, анда дәвалау программалары турында белеп кенә калмыйча, юлламалар отарга, минераль сулардан һәм затлы татар ризыкларыннан авыз итәргә мөмкин иде.