ЯҢАЛЫКЛАР

Бүген ТР Туристлык буенча дәүләт комитетында РФ Дәүләт Думасы депутаты Артем Прокофьев җитәкчелегендә РФ Дәүләт программаларын, федераль максатчан программаларны һәм башка проектларны гамәлгә ашыру мәсьәләләре буенча эшче төркем утырышы узды.

Очрашу барышында «Туристлык һәм кунакчыллык индустриясе» илкүләм проектын, «Лаеш» туристлык территориясен булдыру проектын, шулай ук  «Бөек Идел юлы» проектын финанслау һәм тормышка ашыру мәсьәләләре турында фикер алыштылар.

Бүген Татарстан Республикасы Туристлык буенча дәүләт комитетында  Дәүләт комитеты рәисе Сергей Ивановның «Мәскәү елга пароходчылыгы» ГАҖ вәкилләре – генераль директор Искрин Александр һәм туристлык буенча директор Сидоренков Филипп белән эшлекле очрашуы узды.

Әлеге очрашу кысаларында 2023 елда «Бөек Идел юлы» бренды белән яңа круиз программаларын гамәлгә ашыру буенча төрле яклап хезмәттәшлек итү мәсьәләсе каралды.

Исегезгә төшерәбез, 18 сентябрьдә Татарстан Республикасы Туристлык буенча дәүләт комитеты ярдәме белән Мәскәү – Волгоград маршруты буенча «Бөек Идел юлы» бренды белән беренче круиз башланды, ул 12 шәһәрне, 3 республиканы һәм 7 өлкәне үзара бәйләп торачак.

23-24 сентябрьдә «Василий Суриков» премиум-класслы дүрт палубалы теплоход Татарстан Республикасына килеп, Зөя (Свияжск), Казан, Бөек Болгар һәм Тәтеш утрау-шәһәрчегендә булып кайтты.

«Туристлык һәм кунакчыллык индустриясе» илкүләм проекты чараларын гамәлгә ашыру һәм Татарстан Республикасында туристлык инфраструктурасын булдыру кысаларында Татарстан Республикасының Туристлык буенча дәүләт комитеты тарафыннан гражданнардан кире элемтә буенча мөрәҗәгатьләр алына.

Республикабызда туристларны урнаштыру һәм аларга хезмәт күрсәтү өчен яңа объектлар төзү турындагы тәкъдимнәрегезне дәүләт программаларын үстерү һәм тормышка ашыру бүлеге җитәкчесе Гильмеев Айрат Юсуп улына әлеге электрон почта адресына җибәрүегезне сорыйбыз: a.gilmeev@tatar.ru.

Татарстан Республикасының туристлык волонтерлары берләшмәсенең профильле сменасында җиңүчеләр командасы 24-25 ноябрьдә Мәскәүдә яшьләр туризмы буенча  узган «Үз илеңне бел» эшлекле форумында катнашты.

Форум мәйданында «Знание» Россия җәмгыятеннән һәм Рус география җәмгыятеннән лекцияләр узды, туристлык маршрутлары конкурсында җиңүчеләрне бүләкләү тантанасы һәм фотокүргәзмә оештырылды.

Чараның төп темасы – яңа шартларда яшьләрнең ихтыяҗларына туры килә торган файдалы туристлык продуктларын формалаштыру стратегиясе. Балалар яшьләр өчен маршрутлар, кече шәһәрләргә турлар, Россиядәге истәлекле урыннарның интерактив картасын эзләтә торган мобиль кушымта булдыру буенча проектлар эшләделәр һәм экспертлар жюрие алдында якладылар.

28 ноябрьдән 2 декабрьгә кадәр Иркутск һәм Казан арасында турыдан-туры авиаэлемтәне эшләтеп җибәрү максатында, Иркутск өлкәсе Туризм агентлыгы, ТР Туристлык буенча дәүләт комитеты ярдәме белән, Татарстан Республикасы массакүләм мәгълүмат чаралары вәкилләре өчен реклама туры уздыра һәм кунакларны үз төбәгенең истәлекле урыннары һәм Байкал табигате белән таныштыра. 

Журналистлар һәм блогерлар Ольхон утравы белән таныштылар инде, Борһан ярына җәяү экскурсия ясадылар, шулай ук Хобой ярына барып килделәр. Планнарда - «Тальцы» музеена бару, Листвянка бистәсендәге зур экскурсия программасын үзләштерү: Байкал музеена күз салу һәм таш Черский тавы күзәтү мәйданчыгына менү.

Матбугат туры тәмамлангач, катнашучылар Иркутск өлкәсенең Туризм агентлыгында түгәрәк өстәл артына җыелачак.

04 декабрьдә 13.00 сәгатьтә ТР Арча районының Яңа Кырлай авылындагы «Могҗизалар урманы» интерактив гаилә туристлык паркындагы «Кыш Бабай һәм Кар кызы резиденциясендә»  яңа объектларны ачу тантанасы булачак.

Чара программасы Кыш Бабай биләмәсен, «Теләкләр, хатлар һәм бүләкләр бүлмәләрен» ачу, «Кыш Бабай легендасы» курчак спектаклен, Кыш бабайның үзеннән әкият концертын, татар эстрадасы йолдызы Лилия Хәмитованың чыгышын һәм традицион татар коймаклары һәм үләнле чәй белән сыйлануны үз эченә ала.

Белешмәләрне Резиденция телефоны буенча алырга мөмкин: 8 (843) 260-16-40. «Кыш Бабай» резиденциясе турында тулырак мәгълүмат (сылтама https://tatar-moroz.ru/ceny/).

Бүген Әзербайҗан Республикасы Туристлык агентлыклары берләшмәсендә ТР Туристлык буенча дәүләт комитеты рәисе Сергей Иванов республикабызның туристлык потенциалын тәкъдим итте. Презентация Әзербәйҗан Республикасының Туристлык буенча дәүләт агентлыгы ярдәме белән узды.

Ике республиканың да үзара кызыксынуын исәпкә алып, чарада катнашучылар ике республиканың да туристлык маршрутларын алга этәрү буенча чаралар үткәрү турында килештеләр.

«Халык сувениры» конкурсы игълан ителде. Катнашу өчен төбәкнең сувенир продукциясе осталары һәм җитештерүчеләре чакырыла. 

Конкурста өч номинация тәкъдим ителәчәк: «Бүгенге көн иҗаты: иң яхшы заманча сувенир», «Һөнәрне саклап калып: иң яхшы традицион сувенир» һәм «Ил нәрсә белән горурлана: иң таныла торган сувенир».

Гаризалар 2022 елның 9 декабренә кадәр кабул ителә. Катнашу –  бушлай. Конкурс турында нигезләмә белән әлеге сылтама аша танышырга һәм гариза калдырырга мөмкин: https://www.kp.ru/samobranka/konkurs/.

Кичә Татарстан Республикасы Министрлар Кабинетында Татарстан Республикасы Туристлык буенча дәүләт комитеты рәисе Сергей Иванов Россия Федерациясе Хөкүмәте Рәисе урынбасары Дмитрий Чернышенкога Татарстан Республикасында туристлык тармагы үсешенең агымдагы торышы турында сөйләде.

Туристлык күрсәткечләре турында сөйләде һәм хәзерге вакытта Татарстан Россиядә 7 нче урында тора, ә Идел буе федераль округында номерлар фонды күләме буенча 1 нче урында тора дип билгеләп үтте.  

Шулай ук Туристлык буенча дәүләт комитеты башлыгы республиканың «Туристлык һәм кунакчыллык индустриясе» илкүләм проекты чараларында катнашуы һәм туристлык инфраструктурасына ярдәм итүгә юнәлдерелгән субсидияләр турында сөйләде. 

«Корпорация Туризм.РФ» АҖ генераль директоры Сергей Суханов Дмитрий Николаевичка «Лаеш» перспектив туристлык территориясен үстерү концепциясен тәкъдим итте.

«Чыганакларга сәяхәт» XIII республика конкурсында җиңүчеләр игълан ителде. «Иң яхшы рәсем» номинациясендә – Ирошников Денис, Гыймадиев Леон, Городецкая Диана, Крамень Марк, Хәйруллина Милина, Казан шәһәре. «Иң яхшы мәдәни-танып белү маршруты» номинациясендә – Галимуллина Альбина, Хисамиев Әсхәт, ТР Кукмара районы. Туристлык төрләре буенча «Иң яхшы экскурсия маршруты» номинациясендә: авыл туризмы маршруты – Кузьмина Ксения, Чаллы; этнотуризм маршруты – Салтыкова Ангелина, Макаров Яна, Казан шәһәре; актив туризм һәм ял маршруты – Семенова Елена, Чаллы шәһәре; гастрономик туризм маршруты – Салтыкова Ангелина, Макаров Яна, Казан шәһәре. «Туристлык өлкәсендә иң яхшы проект» номинациясендә – Әхмәдуллина Марианна, Казан шәһәре. «Иң яхшы видео-экскурсия» номинациясендә – Абдуллина Айсылу, ТР Арча районы.

Игътибар итегез, «Татарстан Республикасы буенча иң яхшы виртуаль экскурсия» номинациясендә конкурс Конкурс турындагы нигезләмә нигезендә узмаган дип танылды, чөнки тапшырылган гаризаларның берсе дә конкурс шартларына туры килми.