Экскурсоводларны аттестацияләү процедурасындагы үзгәрешләр турында төп тезислар һәм еш бирелә торган сораулар
2025 елның 1 гыйнварыннан Россиядә экскурсоводларның квалификациясен раслаучы документлар алу өчен дәүләт пошлинасы күләме үзгәрә, ә 1 марттан экскурсия хезмәтләре күрсәтү турында яңа таләп билгеләнә. Татарстан Республикасы Туристлык буенча дәүләт комитетының туры эфирында экскурсоводларның төп мәсьәләләре ачыкланды һәм аңлатмалар бирелде.
2025 елның 1 гыйнварыннан дәүләт пошлинасы күләме Россия Федерациясе Салым кодексының 333.33 статьясының 1 пунктының 72 пунктчасы нигезендә:
• аттестат, таныклык яисә квалификация дәрәҗәсен раслый торган башка документ биргән өчен – 2000 сум;
• фамилиясен, исемен, атасының исемен үзгәртүгә бәйле рәвештә квалификация дәрәҗәсен раслый торган документка үзгәреш кертелгән очракта – 500 сум;
• югалган квалификация дәрәҗәсен раслаучы документның дубликатын биргән өчен – 2000 сум.
Квитанция буенча дәүләт пошлинасын түләгәндә шәхси счет номерын дөрес кертергә кирәк. Түләүнең билгеләнешен һәм түләүне алучының реквизитларын күрсәтеп, квитанция рәсмиләштерү үрнәгенә сылтама: https://tourism.tatarstan.ru/file/pub/pub_4073376.pdf
2025 елның 1 мартыннан экскурсовод Россия Федерациясе субъекты территориясендә, бер муниципаль берәмлек территориясендә яисә Россия Федерациясе субъекты чикләрендәге берничә муниципаль берәмлек территориясендә хезмәт күрсәтү өчен аттестация узарга мөмкин. Әмма Татарстанның аерым муниципаль берәмлекләре буенча аттестация узу мөмкинлеге бары тик 2025 елның 1 мартыннан бирелгән гаризалар өчен генә мөмкин.
Шуңа бәйле рәвештә имтиханның практик өлешендәге сораулар исемлеге үзгәртелде, шулай ук билетларның 3 төре расланды:
- Татарстан Республикасы буенча квалификация имтиханы;
- Казан шәһәреннән квалификация имтиханы;
- Татарстан Республикасы муниципаль берәмлеге (берәмлекләре) буенча квалификация имтиханы.
Яңа сораулар сылтама буенча урнаштырылган: https://tourism.tatarstan.ru/file/pub/pub_4465021.docx Яңа сораулар буенча имтихан 2025 елның 1 мартыннан соң үткәреләчәк.
Һәр билет 2 сорау блогыннан торачак. Имтиханда экскурсоводка сорауларның һәр блогы өчен билет алырга кирәк (ягъни ике тапкыр). Барлык сорауларга да җавап бирү вакыты: 15 минуттан артык түгел.
Экскурсоводлардан килә торган ТОП-3 популяр сорау:
1. Әгәр мин Казан һәм Зөя утрау-шәһәрчеге буйлап экскурсияләр алып барам икән, димәк, миңа аттестацияне Казан һәм Зеленодольск районы буенча гына тапшырырга кирәкме?
Җавап: Юк. Сезгә шулай ук Татарстан Республикасының Югары Ослан районы буенча да имтиханның практик өлешен тапшырырга кирәк булачак, чөнки Казаннан Зөягә кадәр юл шушы муниципаль берәмлек аша уза.
2. Экскурсия эшчәнлеген аттестациясез башкарган өчен нинди җаваплылык каралган? Тикшерүләр ничек булачак?
Җавап: Экскурсоводлар эшчәнлегенә контроль-күзәтчелек фактка планнан тыш күчмә тикшерүләр ярдәмендә гамәлгә ашырылачак:
- экскурсия вакытында экскурсоводның аттестацияне уңышлы узу йомгаклары буенча Татарстан Республикасы Туристлык буенча дәүләт комитеты тарафыннан бирелгән күкрәк карточкасы (бейджы) булу;
- аттестацияләнгән экскурсоводларның федераль реестрында экскурсовод турында язу булуы.
Экскурсия эшчәнлеген бейджсыз һәм федераль реестрда язылмыйча башкаручыларга штраф яный. Административ хокук бозулар кодексына үзгәрешләр кертелгәннән соң, ТР Туристлык буенча дәүләт комитеты өстәмә рәвештә штрафлар күләме турында хәбәр итә.
3. Аттестациягә документлар тапшыру өчен нинди өстәмә белем кирәк?
Җавап: Аттестациягә гариза биргәндә экскурсовод экскурсоводның эш профиленә туры килә торган өлкәдә өстәмә һөнәри белем алу турында документлар тапшыра:
- квалификация күтәрү программасын узу турындагы документ (кимендә 16 сәгать);
- яңадан һөнәри әзерлек программасын узу турындагы документ (кимендә 250 сәгать).
ТР Туристлык буенча дәүләт комитеты телеграм-каналында «Экскурсоводларны аттестацияләү турындагы законнардагы яңалыклар һәм үзгәрешләр» темасы буенча туры эфир язмасы урнаштырылган https://t.me/tourismRT/2891.