ЯҢАЛЫКЛАР
Татарстан Республикасының 29 проекты 2025-2027 елларда урнаштыру өчен модульле капиталь булмаган чаралар булдыруга Россия Икътисадый үсеш министрлыгының конкурс сайлап алуында җиңүче булды. Субсидияләрнең гомуми күләме 739,5 млн.сум тәшкил итәчәк, шуның 536,4 млн.сумы – федераль бюджеттан һәм 203,1 млн.сумы – республика бюджетыннан. Казанда һәм республиканың 16 районында «Туристлык һәм кунакчыллык» илкүләм проекты кысаларында яңа объектлар барлыкка киләчәк.
«Сколково» үзәгендә «Здравница-2025» төп тармак форумы узды, анда Татарстан шифаханәләре үзләренең сәламәтләндерү программаларын тәкъдим иттеләр. Республика шифаханәләре, төбәкнең шифаханә-курорт өлкәсендә лидерлык позициясен раслап, 17 алтын һәм 5 көмеш медаль алдылар. ТР Туристлык буенча дәүләт комитеты ярдәмендә «Татарстан шифаханәләре» ассоциациясенең берләштерелгән стенды кунакларның игътибарын җәлеп итте, анда дәвалау программалары турында белеп кенә калмыйча, юлламалар отарга, минераль сулардан һәм затлы татар ризыкларыннан авыз итәргә мөмкин иде.
«Сәяхәт ит!» халыкара туристлык форумында Татарстан Кытай компаниясе һәм Ульяновск өлкәсе белән стратегик килешүләр төзеде, бу регионны халыкара базарда алга җибәрүне көчәйтергә һәм туристлар өчен яңа мөмкинлекләр булдырырга мөмкинлек бирәчәк.
Туристлык буенча вице-министр Рамон Финоль җитәкчелегендәге Венесуэла делегациясе белән очрашуда Татарстан башкаласы һәм Венесуэла арасында даими яки чартер рейсларны эшләтеп җибәрү перспективалары турында фикер алыштылар. Сөйләшүләр төбәкләр арасында туристлык хезмәттәшлеген үстерү турында апрель килешүләренең дәвамы булды.
Татарстан «Туристлык һәм кунакчыллык» илкүләм проектын уңышлы гамәлгә ашырып, 2021 елдан 2024 елга кадәр 178 проектка 2 млрд сумга якын акча юнәлтте. «Сәяхәт ит!» форумында ТР Туристлык буенча дәүләт комитеты рәисе РФ икътисадый үсеш министры Максим Решетниковка яңа урнаштыру чаралары булдыру, мөмкинлеге чикләнгән кешеләр өчен инфраструктураны җайлаштыру һәм дистәләгән мең кунак җыйган эре фестивальләр уздыру турында хисап тотты.
Татарстан Республикасы ВДНХда «Сәяхәт ит!» халыкара туристлык форумында катнаша, үзенең төп юнәлешләрен һәм уникаль мәдәни традицияләрен тәкъдим итә. Кунакларны интерактив мастер-класслар, танылган музей-тыюлыкларны тәкъдир итү һәм төбәкнең бай мирасы белән танышу мөмкинлеге көтә.
Татарстанның Баулы районында 2025 елның 31 маеннан 2 июненә кадәр «Уяв» чуваш мәдәнияте бәйрәменә багышланган «Арба фест» Бөтенроссия автотуристлык фестивале узачак. Кунакларны суда йөзү, гастрономия фестивальләре, күңел ачулар, иҗат коллективлары чыгышлары һәм чуаш традицияләре белән танышу көтә.
Омск журналистлары һәм блогерлары төркеме Татарстанга туристлык потенциалын өйрәнү өчен матбугат туры кысаларында килде. Программада: Бөек Болгар, Kol Gali Resort & Spa спа-комплексы, Казанның истәлекле урыннары, «Туристлык һәм кунакчыллык» илкүләм проекты кысаларында ачылган «Пляж» яңа термаль комплексы да керде.
Татарстан студентлары Саратов өлкәсендәге «Туриада-2025» спорт-туристлык лагеренда төбәкара туристлык маршруты проектын тәкъдим иттеләр. Проект Идел буе федераль округында эчке туризмны үстерүгә юнәлдерелгән.
ТР Туристлык буенча дәүләт комитетында туристлык элемтәләрен ныгыту өчен Доминикан республикасы илчелеге белән очрашу узды. Кунаклар Республиканың туристлык мөмкинлекләрен бәяләделәр һәм Доминиканада туроператорлар өчен танышу турларын оештыру тәҗрибәсе белән уртаклаштылар.