Татарстан Республикасы Алексеевск районында “Туристлык сыйныфлары” муниципаль проекты старт алды
Татарстан Республикасы Алексеевск районы Биләр авылында сигезенче сыйныф укучылары Казан һәм Зөядән чакырылган белгечләр белән “Туризм һәм кунакчыллык” юнәлешен үзләштерә башладылар.
Биләрдә туризм өлкәсендә яңа белем бирү проектына старт бирелде. Мәктәп базасында ике сигезенче сыйныф укучылары өчен профильле туристлык сыйныфлары оештырылган. Атнага бер тапкыр үткәрелә торган дәресләрне Казан һәм Зөядән чакырылган укытучылар алып бара.
Уку ике елга исәпләнгән. Ул тәмамлангач, укучыларга үз туристик проектларын якларга һәм сертификатлар алырга туры киләчәк. Бу балаларга кунакчыллык индустриясендә булачак һөнәрне аңлы рәвештә сайлау өчен җитди нигез алырга мөмкинлек бирәчәк.
Проектны гамәлгә ашырганда финанс ярдәмен инвестор Алексей Дмитрошкин күрсәтте.
Шунысы мөһим, программа бер теория белән генә чикләнми. Укучылар Казанда булдылар инде, планда - Зөягә һәм республиканың башка төп туристлык объектларына бару. Май аенда укучылар Арбузовлар йорт-музее территориясендә “Музейлар төне” акциясендә катнашачаклар, ә җәй көне инде Биләрнең үзендә туристлык программаларын үткәрүдә көчләрен сынап караячаклар.
“Биләр бүген туристлык юнәлеше буларак актив үсеш кичерә, һәм безгә биредә үзебезнең, җирле белгечләрнең эшләве бик мөһим. Мондый проектлар балаларга һөнәрләрен алдан билгеләргә һәм, теләсәләр, тормышларын туган авыллары белән бәйләргә мөмкинлек бирә”, — дип билгеләделәр инициатива авторлары.
Шул рәвешле, “Туристлык сыйныфлары” проекты бер үк вакытта ике бурычны хәл итә: яшьләргә һөнәри юнәлеш бирү һәм “Туризм һәм кунакчыллык” милли проекты кысаларында үсеп килүче туристлык инфраструктурасы өчен кадрлар потенциалын әзерләү.