Татарстан Республикасы үзенең туристик потенциалын Мәскәүдә MITT халыкара күргәзмәсендә тәкъдим итә
Мәскәүдә MITT туризм һәм кунакчыллык индустриясенең 32 нче халыкара күргәзмәсе уза. Татарстан Республикасы регионның туристик потенциалын Visit Tatarstan берләштерелгән стендында тәкъдим итә, ул музей-тыюлыклардан алып эре туроператорларга кадәр 40ка якын компанияне берләштергән.
Мәскәүдә MITT туризм һәм кунакчыллык индустриясенең 32 нче халыкара күргәзмәсе старт алды. Бу Рәсәйдә иң зур тармак вакыйгасы, быел ул дөньяның 34 иленнән 1000нән артык катнашучыны берләштерде. Рәсәй базарында Оман, Төркия, Венесуэла, Куба, Кытай, Малайзиянең туризм буенча милли офислары, шулай ук базарның әйдәп баручы уенчылары - “Сбер”, “Яндекс Путешествия”, “Островок!” һәм Ozon Travel үз продуктларын һәм хезмәтләрен тәкъдим итәләр.
Татарстан Республикасы гадәттәгечә масштаблы экспозицияле күргәзмәдә катнаша. Күргәзмәдә индивидуаль стенд эшли, анда төбәкнең 40 ка якын компаниясе туристлык потенциалының күптөрлелеген күрсәтә.
Республика делегациясе составында “Казан Кремле”, “Зөя утрау-шәһәрлеге”, Болгар һәм Алабуга музей-тыюлыклары, Чистай муниципаль районы, ТР Милли музее, шулай ук Өчпочмак Йорт-музее һәм “Муллин йорты” сәүдәгәрләр музее үз мөмкинлекләрен тәкъдир итәчәк. Төбәкнең транспорт инфраструктурасын “Төньяк җил” авиакомпаниясе һәм “Казан” халыкара аэропорты тәкъдим итә. Күргәзмәдә ТР шифаханәләре ассоциациясе актив катнаша. Туроператорлар, кунакханәләр һәм башка проектлар тәкъдим ителгән: глэмпинглар, “Союзмультпарк” күңел ачу үзәге, “Бибарс - Татар кунакчыллыгы” этнопроекты һәм “Дикая ферма” кебек популяр ял парклары.
Visit Tatarstan стенды эчтәлекле эшли: тармак вәкилләре туроператорлар белән сөйләшүләр алып бара, республиканың шифаханә-курорт комплексын, яңа туристлык маршрутларын һәм объектларын тәкъдир итә.
Күргәзмә эше йомгаклары буенча Татарстан стенды “Иң актив катнашучы” дипломына лаек булды.
Күргәзмәләрдә катнашу “Туризм һәм кунакчыллык” милли проектының максатларына ирешүгә ярдәм итә, аның төп бурычларының берсе Рәсәй гражданнарына ил буенча туризмның һәркем өчен мөмкин булуы турында мәгълүмат бирү.