Татарстан һәм Венесуэла туристлык хезмәттәшлеген үстерүне дәвам итә
«Сәяхәт ит!» халыкара туристлык форумы кысаларында Татарстан Республикасы Туристлык буенча дәүләт комитеты вәкилләренең халыкара туристлык буенча вице-министр Рамон Финол җитәкчелегендәге Венесуэла делегациясе белән эшлекле очрашуы булды. Элегрәк апрель аенда Венесуэла вәкилләре Казанга төбәк белән танышу һәм үз илләренең туристлык потенциалын тәкъдим итү өчен килгәннәр иде.
Авиаэлемтәне оештыруга аерым игътибар бирелде. Хәзерге вакытта Мәскәү һәм Венесуэла арасында туры рейслар эшли, якын арада аларны Санкт-Петербургтан җибәрү планлаштырыла. Венесуэла ягында Каракас-Казан маршруты буенча туры яки чартер рейслар оештыру мөмкинлеге аеруча кызыксыну уятты.
Венесуэла партнерлары Татарстаннан туристлар җәлеп итү белән кызыксынуларын белдерделәр, бигрәк тә кышкы сезонда. Бу максатларда алар Татарстан туроператорларын үз илләренең туристлык мөмкинлекләре белән яхшырак таныштыру өчен презентация уздырырга тәкъдим иттеләр.
«Без Татарстан белән хезмәттәшлектә зур потенциал күрәбез һәм актив уртак эшкә әзер», - дип билгеләде Рамон Финоль очрашу йомгаклары буенча.
Халыкара хезмәттәшлекне үстерү, туроператорлык бергәлеге арасында элемтәләрне җайга салу «Туристлык һәм кунакчыллык» илкүләм проектының 2030 елга турхезмәтләр экспортын өч тапкырга арттыру максатларына ирешүгә юнәлдерелгән.