Nordwind Airlines Россия авиакомпаниясе һәм Вelavia Белоруссия авиакомпаниясе Казан аша уртак рейслар ача
Nordwind һәм Belavia хезмәттәшлек турында килешү имзалап, Казан аэропортын Россия һәм Беларуссия арасындагы төп транзит узелларның берсе иттеләр. Пассажирларга кабат теркәлмичә һәм багажны артык йөкләмичә уңайлы тоташу, шулай ук Казанда 36 сәгатькә кадәр тоткарлану мөмкинлеге гарантияләнә.
Nordwind Airlines Россия авиакомпаниясе һәм Вelavia Белоруссия авиакомпаниясе Россия һәм Беларуссия арасында сәяхәт итүче пассажирлар өчен мөмкинлекләрне сизелерлек киңәйтәчәк килешүгә кул куйдылар. Бу хезмәттәшлек кысаларында төп күчеп утыру үзәге Габдулла Тукай исемендәге «Казан» халыкара аэропорты булачак.
Новокузнецк, Барнаул, Кемерово, Улан-Удэ, Иркутск һәм Россиянең башка шәһәрләрендә, шулай ук Таҗикстан – Бишкек һәм Хуҗандта яшәүчеләр, Казан аша Минскига уңайлы барып җитү мөмкинлеген алачаклар. Үз чиратында, Беларуссия халкы, Казан аэропортын транзит пункты буларак кулланып, Себер һәм Урал шәһәрләренә кадәр оча алачак.
Моннан тыш, пассажирларга кабат рейска теркәлергә яки багаж турында борчылырга кирәк булмаячак: барлык формальлекләр беренче этапта хәл ителә, ә багаж автомат рәвештә икенче рейска йөкләнәчәк.
Тариф кысаларында кунаклар Казанда 36 сәгатькә кадәр калырга мөмкин, бу аларга шәһәрнең истәлекле урыннары белән танышырга мөмкинлек бирәчәк.
Казан аэропорты Россиядә Belavia Россия авиакомпаниясе белән хезмәттәшлек иткән өченче аэропортка әйләнде. Маршрут челтәрен киңәйтү «Туристлык һәм кунакчыллык» илкүләм проекты кысаларында Татарстан Республикасына пассажирлар агымын арттыруга һәм туризмны үстерүгә ярдәм итә.
Фото: Сергей Журавлев / KazanFirst