Бүген туристлык волонтерларының i.Pro профиль-белем бирү сменасы старт алды
2024 елның 12-14 ноябрендә Татарстан Республикасы Биектау муниципаль районының «Добрый» балаларны савыктыру лагеренда туристлык волонтерлары өчен ел саен уздырыла торган профильле белем бирү сменасы уза, ул яшьләрнең эчке туризм өлкәсенә җәлеп ителүенә ярдәм итә. Сменаны Татарстан Республикасы Туристлык буенча дәүләт комитеты һәм «Татарстан Республикасы туристлык волонтерлары ассамблеясе» АКО үткәрә.
Белем бирү сменалары ТР Туристлык буенча дәүләт комитеты һәм ТР туристлык волонтерлары ассамблеясе тарафыннан 2011 елдан бирле үткәрелә һәм аларның төп максаты – волонтерларны укыту, аларны яңа инновацион проектларны гамәлгә ашыруга мотивацияләү һәм туристлык бизнесы профессионаллары белән таныштыру.
Быел сменада Татарстан Республикасы туристлык волонтерлары ассамблеясенең 55 студент-волонтеры, шулай ук Татарстан Республикасының башка районнарыннан волонтерлар хәрәкәте вәкилләре катнаша. Балалар туристлык тармагы өчен кадрлар әзерләүче профильле югары уку йортлары студентлары булып торалар. Бу – Идел буе дәүләт физик культура, спорт һәм туризм университеты, В.Г.Тимирясов исемендәге Казан инновацион университеты һәм аның филиаллары, Казан (Идел буе) федераль университеты һәм «ТИСБИ» идарә университеты.
Белем бирү сменасы кысаларында студентларга Татарстан Республикасының туристлык һәм кунакчыллык өлкәсендәге экспертлары – югары уку йортлары укытучылары, хакимият органнары, шулай ук гамәлдәге туризм предприятиеләре вәкилләре лекцияләр укыячак. Проект төркемнәре билгеләнәчәк, аларда катнашучылар экспертлар жюрие каршында туристлык өлкәсендәге проект өчен үз идеяләрен эшләячәк һәм яклаячак.
«Татарстан Республикасы туристлык волонтерлары ассамблеясе» АКО волонтерлары Казан шәһәре һәм республиканың төп туристлык үзәкләре территориясендә үткәрелә торган эре туристлык чараларын оештыруда һәм уздыруда актив катнашалар. Ел саен волонтерлар туристларга һәм шәһәр халкына Казан шәһәрендә һәм Татарстан Республикасында ял итү һәм сәяхәт итү мөмкинлекләре турында хәбәр итәләр, «Кунакчыл Казан» проекты кысаларында шәһәрдә йөрергә ярдәм итәләр.
Проект яшьләрне туристлык өлкәсенә җәлеп итүгә ярдәм итә һәм республика кунакларына мәгълүмати хезмәт күрсәтү сыйфатын күтәрергә ярдәм итә, бу «Туристлык һәм кунакчыллык индустриясе» илкүләм проекты максатларына һәм бурычларына җавап бирә.