“Иске Казан”да - милли моңнар
17 август сәгать кичке 5тә “Ярдәм” милли ислам хәйрия һәм “Бәхетле дөнья” фондлары Биектау районы Камай авылындагы “Иске Казан” дәүләт музей-тыюлыгында “Иске Казан”да - милли моңнар” хәйрия концертын оештыра. Иске Казанда мондый чара беренче тапкыр уздырыла һәм Россиядә Мәдәният һәм тарих елына багышлана.
“Милли моңнар” бәйрәменең максаты – яшь буынны Татарстандагы тарихи урыннар белән таныштыру һәм алар белән таныштыру. “Иске Казан” комплексы шундый тарихи урыннарның берсе. Моннан кала, “Иске Казан”да танылган татар җырчылары башкаруында милли моңнар тыңлап булачак. Чараны оештыручылар татар мәдәниятенең зур байлыгы булган милли моңнарны яшь буынга тапшыру бурычын куя. Концерттан җыелган акчалар Казанның “Ярдәм” мәчетендә күрмәүчеләрне һәм “ДЦП” диагнозлы инвалидларны тернәкләндерүгә тотылачак.
“Иске Казан” музей-тыюлыгында Идел Болгары, Алтын Урда һәм Казан ханлыгы чоры һәйкәлләре бар. Иске Казанга килүче һәрбер кеше татар тарихының байлыгын үз күзләре белән күрә алачак.
“Милли моңнар” проекты һәм “Бәхетле дөнья” фонды җитәкчесе - Рөстәм Исхакый, проектның төп мәгълүмати партнерлары – ТНВ телеканалы һәм “Тәртип” радиосы, дип “Татар-информ” агентлыгына хәбәр итә бәйрәмне оештыручылар.