Яңа төзелгән кунакханәләр өчен салым ташламаларын озайту турындагы закон үз көченә керде
Татарстанда өч йолдызлы яңа кунакханәләр өчен милеккә салымның киметелгән ставкасы хәзер 2030 елның 31 декабренә кадәр файдалануга тапшырылган объектлар өчен мөмкин.
2025 елның 11 декабрендә яңа төзелгән кунакханәләр өчен салым ташламаларын озайту турында Татарстан Республикасы Законы үз көченә керде. Тиешле документ агымдагы елның 27 ноябрендә Татарстан Республикасы Дәүләт Советы утырышында беренче укылышта кабул ителде һәм Татарстан Республикасы Рәисе Р.Н.Миңнеханов тарафыннан имзаланды.
«Оешмалар мөлкәтенә салым турында» Татарстан Республикасы Законының 3 статьясына үзгәреш кертү хакында» Закон салым преференцияләренә дәгъва итә ала торган кунакханәләрне файдалануга тапшыру срогын 2030 елның 31 декабренә кадәр озайтуны күздә тота. Элегрәк бу срок 2026 елның 31 декабрендә чикләнгән иде.
Исегезгә төшерәбез, салым ташламасы түбәндәге критерийларга туры килә торган кунакханәләргә кагыла:
- Кунакханә категориясе – кимендә 3*
- Номерлар фонды – кимендә 50 номер
Мондый объектлар өчен милеккә салым эксплуатациягә кертелгәннән соң ун ел дәвамында 0,1% киметелгән ставка буенча исәпләнәчәк.
Әлеге чара республиканың кунакханә инфраструктурасын үстерүне стимуллаштыруга һәм заманча кунакханәләр төзелешенә акча салучы инвесторларга ярдәм итүгә юнәлдерелгән.