Самара делегациясе Казанга туристлык һәм Идел буе маршрутларын үстерү өлкәсендә тәҗрибә уртаклашу өчен килде
Самара өлкәсеннән губернатор Владимир Федорищев җитәкчелегендәге делегация Казанга эш визиты белән килде. Визит кысаларында ТР Туристлык буенча дәүләт комитеты Самара өлкәсе туризм министрлыгы белән төбәк туризмын үстерүдә уңышлы тәҗрибәсе белән уртаклашты. «Бөек Идел юлы» төбәкара проекты кысаларында елга круизларын үстерү төп тема булды.
Казанга эш визиты белән Самара өлкәсеннән губернатор Владимир Федорищев җитәкчелегендәге делегация килде. 50гә якын кешедән торган делегация составында — төп министрлыклар һәм ведомство буйсынуындагы оешмалар җитәкчеләре, шул исәптән туризм министры Екатерина Матвеева һәм губернатор ярдәмчесе Артур Әбдрәшитов.
Визитның төп максаты Татарстанның туристлык инфраструктурасын үстерүдәге уңышлы тәҗрибәсен өйрәнү һәм «Бөек Идел юлы» региональара хезмәттәшлек перспективалары турында фикер алышу, бигрәк тә елга туризмы өлкәсендә.
Казанда делегация:
- елга потенциалын өйрәнде. Самара вәкилләре Казан елга вокзалын һәм яңа тизйөрешле флотны карап чыктылар. Сөйләшүләрнең төп темасы «Елга магистральләре» федераль программасы кысаларында «Бөек Идел юлы» бренды белән «Казан – Ульяновск – Самара» төбәкара маршрутын эшләтеп җибәрү булды. «ТР флоты» АҖ үз оешмасын булдыру тәҗрибәсе белән уртаклашты.
- «Зөя утрау-шәһәрлеге» музей-тыюлыгында булды, анда ЮНЕСКО Бөтендөнья мирасы исемлегенә кертелгән территория белән идарә итү тәҗрибәсен өйрәнде. Моннан тыш, алар автотуристлар өчен «Осиново» кемпингы, «Ak Bars Golf & Resort» кунакханәләре һәм аңа якын гольф-комплекс, «Ногай» һәм Kazan Palace byTasigo кебек туристлык объектлары эше белән таныштылар.
- Иске Татар бистәсендә һәм «Туган авылым» комплексында булдылар, анда аларны туристлар өчен интерактив программалар оештыру һәм шәһәрнең туристик коды программасын гамәлгә ашыру тәҗрибәсе кызыксындырды.
Шулай ук делегация әгъзалары ТР Туристлык буенча дәүләт комитеты рәисе Сергей Иванов һәм «ТР флоты» АҖ генераль директоры Роман Лизалин белән очрашты. Анда яклар ике төбәктә туристлыкны үзара үстерү мөмкинлекләре турында фикер алыштылар.
Бу визит Самара өлкәсе белән Татарстан Республикасы арасында партнерлыкны ныгыту өчен мөһим адым булды.
Төбәкара хезмәттәшлек «Туристлык һәм кунакчыллык» илкүләм проектының туристлык сәфәрләре санын 2030 елга 140 млн кешегә кадәр арттыру максатларының берсенә ярдәм итә.