ТР Туристлык буенча дәүләт комитеты делегациясе Оман белән туризм үсеше потенциалын өйрәнә
Татарстан Республикасының туристлык потенциалын алга сөрү максатыннан, Татарстан Республикасының Туристлык буенча дәүләт комитеты делегациясе бу көннәрдә Оман Солтанлыгында роуд-шоу үткәрә. Хезмәттәшлекне үстерү потенциалы турында фикер алышу өчен 23 майда ТР Туристлык буенча дәүләт комитеты рәисе Сергей Иванов Оман Солтанлыгының туристлык һәм мәдәни мирас министры урынбасары Аның Югарылыгы Азаан Әл Бусайди Azaan белән очрашу үткәрде.
Очрашуда хезмәттәшләр чит ил базарларында, аерым алганда, Россиядә һәм Оманда үз дестинацияләрен алга этәрү планнарын тәкъдим иттеләр, Маскат белән Казан арасында туры авиаэлемтә ачу, шулай ук тармакның эшлекле вәкилләренә туристлык тәкъдимнәре турында мәгълүмат бирү өчен үзара чаралар үткәрү турында сөйләштеләр.
Шулай ук җирле авиаташучы Oman Air һәм Россиягә туристлар җибәрүгә махсуслашкан җирле туроператорлар белән очрашулар да узды.
Белешмә өчен.
Оман – Көньяк-көнбатыш Азиядә кечкенә гарәп дәүләте, туризм өчен кызыклы ил булып тора, анда чиста диңгездә су коенырга, тауларны һәм шарлавыкларны күрергә, чүлләрнең эсселеген кичерергә һәм оазисларның салкынлыгыннан ләззәтләнергә мөмкин. Монда мәдәни-тарихи мирасны саклыйлар, гореф-гадәтләрне һәм традицияләрне хөрмәт итәләр. Шул ук вакытта Оман башкаласы Маскат бер үк вакытта традицион Оман стилен һәм заманча инновацияләрне берләштерә.
Россияне Оман Солтанлыгы белән туры авиаэлемтә бәйли. Oman Air авиакомпаниясе Маскат-Мәскәү маршруты буенча атнага 3 тапкыр рейслар башкара.
Оманга туристлык максатларында 14 көннән дә артык булмаган вакытка барырга ниятләгән Россия гражданнарына виза кирәкми. Оман гражданнарына Россиягә барганда виза кирәк, әмма җиңел механизмнан файдаланып, электрон виза рәсмиләштерергә мөмкин, мондый виза Россия территориясендә иң күбе 16 көн булу мөмкинлеген бирә.