Мамадыш шәһәрендәге SUNNYFEST креатив чана фестивале быел рекордлы санда тамашачы җыйды
Мамадыш шәһәрендә SUNNYФЕСТ креатив чана фестивале узды, быел ул рекордлы санда тамашачы җыйды – фестивальгә 10 мең кеше килде, алар арасында республиканың 47 коллективы, Татарстанның үз районын һәм үз командасын бөтен матурлыгы белән тәкъдим итеп, ярышларда катнашты.
Фестивальне Мамадыш районы башлыгы Анатолий Иванов ачты, сәламләү сүзендә ул махсус операциядә катнаша торган хәрбиләргә мөрәҗәгать итте, һәлак булганнарны бер минут тынлык белән искә алдылар – быел күп кенә командалар креатив чаналарын егетләргә теләктәшлек белдерү йөзеннән бизәгәннәр иде.
ТР Туристлык буенча дәүләт комитеты рәисе Сергей Иванов фестивальдә катнашучыларга чираттагы заезд алдыннан мөрәҗәгать итте: ул фестивальнең елдан-ел зуррак әйләнешкә керүен билгеләп үтте һәм Мамадыш халкына, фестиваль кунакларына мондый актив катнашулары өчен рәхмәт белдерде, бигрәк тә чаналар ясауда осталыкларын күрсәткән командаларны билгеләп үтте.
Исегезгә төшерәбез, SUNNYФЕСТ креатив чана фестивале Мамадыш шәһәрендә җиденче тапкыр узды, иң гадәти булмаган катнашучылар арасында – «Вятские Хватские» командасы, алар үз чаналарын көнкүреш чүп-чарлары – полиэтилен, пластик, металлдан бизәгәннәр, шуның белән экологияне саклау өчен калдыкларны икенчел эшкәртүнең мөһимлегенә тагын бер кат игътибар иттерделәр.
Фестивальнең сәүдә рәтләрендә җирле продукцияне – Татарстан фермерлары һәм җитештерүчеләре, шулай ук халык осталары тәкъдим итте. Тарихи чаналар күргәзмәсе шулай ук күп тамашачыларны җәлеп итте, итекле хоккей үз җанатарларын сөендерде, кунакларны чәй һәм беленнәр белән сыйладылар.
Мамадыш шәһәрендә яшәүчеләргә һәм кунакларга ипподром территориясендә кызыклы күңел ачулар тәкъдим ителә – чаңгы трассасы, шугалак, сноутюбинглар өчен таулар, кар машиналарында, атларда йөрү, теләгән һәркемне тәмле үлән чәйләре һәм пешкән милли ризыклар белән сыйлыйлар. Мамадыш муниципаль районы тиз темплар белән үсә, тиздән ипподром янында тау чаңгысы трассасы төзелә башлаячак.
SUNNYFESTE фестивале тәмамланганнан соң жюри әгъзалары масштаблы чарага йомгак ясадылар, беренче, икенче һәм өченче урыннарны бирделәр:
«Бу кайда күренгән?!» номинациясе (иң креатив чаналар, спектакль һәм костюмнар иҗаты):
1 урын – «Вятские Хватские» командасы, Вятские Поляны шәһәре;
2 урын – Шәдче урта гомуми белем бирү мәктәбе командасы, Мамадыш районы;
3 урын – «Урман легендалары» командасы, Әлмәт районы.
«Ут була күрсен!» номинациясе (Утлар белән бизәкләү, материалларның иҗадилеге һәм иллюминация):
1 урын – «Утлы чаналар» командасы, Нурлат районы;
2 урын – «Малибуны коткаручылары» командасы, Мамадыш районы;
3 урын – Чистай шәһәренең «Зәңгәр трактор» командасы.
«Майдан шуган кебек!» номинациясе (таудан иң тиз шуып төшү):
1 урын – «Элекке заман геройлары» командасы, Питрәч районы;
2 урын – Казан шәһәре «ТАИФ НК АЗС» командасы;
3 урын – «Могҗиза чаналары» командасы, Мамадыш районы.
«Төшеп җиттек!» номинациясе (таудан иң озын юл белән шуып төшү):
1 урын – «Зәңгәр трактор» командасы, Тукай районы;
2 урын – «ТМ ТЕАМ» командасы, Саба районы;
3 урын – «Бадминтон патшалары» командасы, Азнакай районы.
Тамашачылар симпатиясе призы: Азнакай шәһәренең «АЛГА» командасы. Мамадыш муниципаль районы башлыгы А.П.Иванов бүләге: Казан шәһәренең «Ак кремль» командасы. Гран-при: Мамадыш шәһәренең «Мин ябыгам» командасы һәм Сарман районының «Татар борычлары» командасы.