Бүген Казан туроператорлары өчен Габдулла Тукай әдәби музеена реклама туры үткәрелде. Бу елның августы ахырында музейның яңартылган экспозициясе ачылды. Музейның экспозициясе килүчеләрне Габдулла Тукай язмышы һәм иҗаты белән, аның Сембер губернасына, Нижгарга, Әстерханга, Өфәгә, Троицка һәм Санкт-Петербургка сәяхәтләре белән таныштыра. Музейда шагыйрьнең исән чагында бастырылган китаплары, аның фоторәсемнәре, шулай ук ул хезмәттәшлек иткән редакцияләрнең гәзитләре һәм журналлары, шәхси әйберләре тәкъдим ителгән.